Sesorah Peresmian Gedung Sekolah
Assalamu’alaikum
wr. wb.
Ibu
Bupati ingkang tansah sinudarsana, ingkang pantes pinundhi bapak ketua pembangunan,
bapak/ibu guru ingkang bagya mulya, bapak/ibu wali murid ingkang kinurmatan,
kaliyan siswa-siswi ingkang kula tresnani.
Kanthi
puji syukur dhumateng Gusti ingkang Maha Agung, ingkang sampun paring rahmat
lan hidayahipun, katitik panjenengan sedaya saha kula taksih pinarengaken
kempal manunggal silaturahmi wonten ing mriki.
Matur
nuwun sanget dhumateng juru pranata adicara ingkang sampun maringi wekdal
dhumateng kula supados ngaturaken tangggap wacana pambuka peresmian
gedung/wisma SMA Negeri 1 Kebumen ingkang sampun karantam wonten ing rantaming
adicara.
Kula
minangka kepala sekolah SMA Negeri 1 Kebumen ngaturaken panuwun ingkang tanpa
pepindhan dhumateng bapak/ibu guru, karyawan, wali murid, kaliyan siswa-siswi
ingkang sampun paring sumbangsih kadarman ingkang arupi punapa kemawon, bau
suku, rigen pratikel ingkang tulus ikhlas. Langkung-langkung gedung punika minangka
wadhah pembinaan putra-putri tunas kalajenganipun bangsa.
Mboten
kantun ugi kula minangka kepala sekolah SMA Negeri 1 Kebumen ngaturaken gunging
panuwun dhumateng pisungsung subsidi saking Pamarintah Pusat. Kula atas nami
kepala sekolah mboten saged ngaturaken punapa-punapa, pramila sagedipun namung
ngaturaken puji pangastuti mugi-mugi lubering sih kautaman sedaya kala wau
pikantuk lilentu saking Gusti ingkang Maha Agung.
Ugi
kula ngaturaken panuwun dhumateng karyawan pembangunan sampun kanthi semangat
lan pengapdian ingkang inggil lan rasa tanggel jawab ingkang ageng saged
mungkasi pembangunan gedung punika kanthi rancangan tuwin wekdal ingkang
sakmesthipun.
Salajengipun
mangga sesarengan kita awrat gedung ingkang sampun sumadya, awit kangge njagi
kelestarianipun punika langkung awrat katimbang ngadani satunggaling bangunan.
Peresmian gedung punika samangke dipun adani Ibu Bupati Kebumen.
Semanten
saha mekaten atur kula. Mugi sami kepareng maringi pangapunten tumrap sadaya
kakirangan saha kalepatan kula.
Wassalamu’alaikum
wr. wb.